Túrurin byrjar við stóra parkeringsplássið 800 m norðan fyri Sundsháls. Fylg vegnum niðan móti tjørnini á Sundshálsi og haðani beina leið niðan á Reiðskarð, eisini kallað Norðaraskarð í Syðradali.

Gøtan er løtt at ganga og havnarfólk brúka hana nógv, so hon sæst væl – eisini tí at so nógvir varðar eru laðaðir fram við gøtuni. Lendið er sera slætt og útsýnið gott yvir á Eysturoynna og suðureftir móti Havnini. Tað er vakurt at koma niðaná og síggja tjørnina við Koltri í baksýninum.

Gingið verður oman til nýggja uppdyrkingarvegin, sum syðradalsbóndin hevur gjørt niðan í Niðara botn. Haðani verður gingið oman til portrið, sum leiðir tvørtur um Breiðá, uml. 100 m frá høvuðsvegnum. Komin tvørtur um ánna gongur leiðin til endan á uppdyrkingarvegnum og síðani eftir reyðu pelunum allan vegin til Norðradals. Ongir varðar eru á leiðini, men pelarnir standa tætt, so tað er lætt at ganga eftir teimum. Tá ið vit koma út í líðina í Tungulið, kann fyrsti partur vera eitt sindur avbjóðandi, tí at komið verður so tætt at tromini niðri á bakkanum. 
Her er vakurt at ganga norður gjøgnum líðina í Tungulið. Niðan fyri okkum síggja vit oman á tangarnar, har heilt fitt av brimi kann vera, og út fyri okkum hava vit Koltur við sínum eyðkenda skapi. 
Tá ið vit koma hálva leið norður gjøgnum Tungulið, áraka Hellisgil, koma vit til fleiri stór og djúp gil, har tað er serliga vakurt og hugnaligt.
Um Tungulíðgjógv verður gingið nakað niðan, uml. í 108 m hædd, har lættari er at ganga, og har eitt portur er at ganga ígjøgnum. Haðani verður gingið beina leið til bøgarðsportrið í Norðradali. 
Við bøgarðsportrið kanst tú velja beinanvegin at ganga longur niðan í Sunnara botn, ella fyrst ein túr eftir bygdagøtuni yvir í vøkru og hugnaligu Dalagjógv, sum vit viðmæla. Í gjónni verður gingið oman í hana gjøgnum eitt rókarlag.

Gingið verður yvir aftur og út gjøgnum bøgarðsportrið. Fylg pelunum vinstrumegin niðaneftir móti Sunnaraskarði. Tað er hampiliga bratt at ganga niðan í Sunnara botn, men her er kortini vallað og gott at ganga allan vegin. Úr botninum verður hildið fram niðan norðarumegin ánna, gjøgnum bratta Rossarygg, sum er uml. 70 m høgur – niðan í lítla dalin beint omanfyri. Við fyrsta varðan beint oman fyri Rossarygg er vakurt at hvíla eina løtu við góðum útsýni yvir allan Norðradal og heilt vestur til Vágafjøllini. Hinumegin ánna, undir rókunum á Tungulíðfjalli, síggja vit hina gøtuna niðan gjøgnum Sunnara botn, kallað niðan gjøgnum Hellissvað. Tann gøtan bleiv vanliga brúkt, tá ið ross vóru við – og tískil kallað Rossagøtan. 
Ein søgn er um hetta plássið oman fyri Rossarygg. Søgnin sigur frá einum presti, sum var á veg úr Havn til Norðradals at prædika kristnu trúnna í teirri tíðini, tá ið partur av føroyingum framvegis var ásatrúgvandi. Norðradalsmenn, sum vóru í Havn, komu í fylgi við henda prest, men teimum dámdi onki hansara ørindi í Norðradali. Teir avtalaðu tí sínámillum, at tá ið teir komu oman gjøgnum skarðið, skuldu teir stoyta hann oman. Presturin, sum var ókunnigur og einki ilt vardi, bleiv skumpaður útav her uppi á Rossaryggi og steðgaði ikki fyrr enn niðri á sløttum, og tá hevði hann brotið hálsin og var deyður. Skarðið verður í dag eisini kallað Lýðarssonarskarð ella Lýsnaskarð – allarhelst eftir prestinum.

Síðani verður gingið stutta teinin niðan í dalin omanfyri og haðani niðan á Sunnara skarð, har vit njóta góða útsýnið oman yvir Kaldbaksfjørð og yvir á Eysturoynna. Haðani er slætt og gott at ganga oman gjøgnum reynið, til Sundsháls.